ИСТАНБУЛ (АА) – Финска соопшти дека го одобрила 18. пакет поддршка за одбраната на Украина во вредност од околу 98 милиони евра, пренесува Анадолу.
Вредноста на целиот одбранбен материјал доставен досега изнесува околу 1,3 милијарди евра, се вели во соопштението на финската Влада по одлуката донесена од претседателот Саули Нинисто.
Во соопштението се истакнува дека повеќе детали за содржината на пакетот нема да бидат откриени од оперативни причини и со цел „да се осигури помошта безбедно да стигне до својата дестинација“.
„Поддршката на Финска и нашите сојузници за Украина останува непоколеблива. Суштинското прашање во однос на идниот безбедносен поредок во Европа и во Финска е да можеме да ја спречиме руската агресија врз Украина“, се додава во соопштението што го цитира министерот за одбрана Анти Хаканен.
Во средата, украинскиот претседател Владимир Зеленски на прес-конференцијата со финскиот премиер Петери Орпо по состанокот во Киев изјави дека Финска ќе го одобри 18. пакет одбранбена поддршка за Украина.
