Фудбалската федерација на Македонија (ФФМ) отвори дисциплинска постапка против ФК Шкендија, откако навивачите на клубот покажаа непочитување кон жртвите од трагичната несреќа во Кочани, игнорирајќи ја минутата молк.
Од ФФМ оценуваат дека овој чин претставува сериозно кршење на спортските и етичките норми и најавуваат дека ќе преземат соодветни мерки за да спречат слични инциденти во иднина.
„ФФМ ќе преземе соодветни мерки согласно правилата со што ќе обезбеди вакви недолични постапки никогаш повеќе да не се повторат. За вакви нелуѓе нема место во фудбалот. Нека се огледаат на Шкендија Арачиново, која покажа достоинство и почит кон жртвите и целокупната ситуација во државата“, се вели во соопштението на ФФМ.
ФФМ потсетува дека пред неколку недели донесе одлука да ги испразни трибините за гостинските навивачи во Струга поради слични инциденти. Федерацијата нагласува дека ова правило ќе се применува строго и без исклучок.
Од ФФМ испратија порака дека македонскиот фудбал треба да остане простор на фер-плеј, почит и спортски дух.
ИЗВОР: racin.mk
