Парламентарната комисија за избори и именувања, на денешната седница, гласаше за Фатон Селами како предлог за Народен правобранител. Изборот ќе се случи на пленарна седница на Собранието, а за тоа е потребно мнозинство гласови од вкупниот број пратеници.
Пратеникот на коалицијата ВЛЕН, Беким Ќоку, ја претстави биографијата на Селами.
„Во име на пратеничката група на ВЛЕН го предлагаме за кандидат за канцеларијата на Народниот правобранител г-дин Фатон Селами. Фатон Селами е од Тетово, е во брак и има тројца деца, го завршил Правниот факултет на Универзитетот на ЈИЕ, постдипломските студии исто така на истиот универзитет, го има положено нотарскиот испит и правосудниот испит и има долгогодишно искуство.“, порача Беким Ќоку.
Арбана Пашоли, пратеничка на Европски фронт, се пожали дека не им било дадено доволно простор за да ги изразат нивните предлози и сугестии.
„Овие политички игри треба да престанат. И ако сте посветени на парламентарната демократија, треба да ни го дадете целото потребно време за да ги изразиме нашите мислења и да нè сослушате.“, вели Арбана Пашоли.
Пратеничката на СДСМ, Сања Лукаревска, истакна дека во иднина, за толку чувствителни и клучни позиции, потребно е кандидатите да се определуваат и објавуваат порано и процесот да биде транспарентен.
„Без разлика дали сме законски обврзани или не да ги интервјуираме овие 17 кандидати, многу потранспарентно и соодветно за јавноста би било ако имавме јавна дебата преку нивна презентација за да го видиме нивниот визија, мисија, рамката и стратегијата за тоа како планираат да работат овие кандидати.“, вели Сања Лукаревска.
Доколку Фатон Селами ги добие потребните гласови, ќе го замени Насер Зибери, кој веќе се пензионира.
ИЗВОР: ТВ 21
