Орце Ѓорѓиевски, градоначалник на општина Кисела Вода и кандидат за градоначалник на град Скопје, најави дека Скопје ќе стане дел од мрежата на градови каде се реализира EXIT фестивалот.
„Скопје мора да биде град кој живее и навечер, град во кој младите ќе имаат простор за ноќен живот, забава и култура. Град кој пулсира и дава енергија. И заедно ќе успееме во тоа“, изјави Ѓорѓиевски.
Организаторите на EXIT истакнуваат дека младинскиот и фестивалскиот туризам носат значителни економски придобивки, со повеќе од 300 милиони евра туристички прилив само во Нови Сад и Србија.
„Готово сите европски престолнини веќе се домаќини на големи фестивали кои значително придонесуваат за развојот на туризмот и брендирањето на дестинацијата, и Скопје заслужува да се најде меѓу нив. Македонската публика е од првиот ден меѓу најверните на EXIT и затоа сме подготвени, во партнерство со локалните промотери, организации и музичари, веќе следната година да го покренеме големиот фестивал во Скопје и да помогнеме престолнината на Македонија да стане една од водечките фестивалски дестинации во Европа“, додаваат организаторите.
