Дигиталното евро ги загрижува банките, кои стравуваат од можна голема загуба на приходите доколку поединците почнат масовно да ги повлекуваат своите депозити од нивните сметки и да ги претвораат во дигитално евро, кое, за разлика од банкнотите и монетите, не би било во нивните биланси. Затоа, Комисијата предлага да се ограничи износот што секој поединец може да го држи во дигитална валута
Европската комисија денеска предложи воспоставување рамка за можно воведување дигитално евро и предлог да се обезбеди задолжително прифаќање на готовинските плаќања со цел да се отфрли стравот на многумина дека дигиталната валута може целосно да ја замени готовината. Комисијата, исто така, предложи дигиталното евро, нематеријална валута, да добие статус на законско средство за плаќање во еврозоната, а моментално само банкнотите и монетите на еврото го имаат тој статус.
„Денешните предлози, исто така, ќе гарантираат дека готовината ќе остане целосно достапна, истовремено дозволувајќи и на Европската централна банка да ги развие практичните аспекти на дигиталното евро со текот на времето“,
рече извршниот потпретседател на Комисијата, Валдис Домбровскис.
Тој додаде дека дигиталните плаќања во евра ќе бидат безбедни и сигурни, инстант и практични – онлајн и офлајн.
Воведување до 2028 година
Дигиталното евро би ги понудило можностите што ги даваат картичките и апликациите и денес, но и плаќање без пристап до интернет, што не е можно со картички или мобилни апликации. „Офлајн“ дигиталното евро ќе овозможи трансакции дури и без интернет-врска доколку другата страна во трансакцијата е физички блиску, било да е тоа лице или продавница. Ова исто така би овозможило плаќање во оддалечени области со несигурна интернет-врска и во случај на недостиг на комуникациски мрежи или прекини на струја.
Законодавните тела во ЕУ, Советот и Парламентот се одговорни за донесување на правната рамка, но конечната одлука за воведување на дигиталното евро ја носи Европската централна банка. Комисијата наведува дека ќе бидат потребни неколку години за да се воведе дигитално евро, во секој случај тоа нема да се случи пред 2028 година.
Дигиталното евро исто така би било еквивалентно на готовина. За разлика од крипто-средствата, дигиталните евра ќе бидат пари на централната банка. Европската централна банка би гарантирала дека се безбедни, дека дигиталното евро има стабилна вредност и дека може да се замени по номинална вредност за евра готовина. Спротивно на тоа, крипто-средствата може значително да флуктуираат во вредноста и нивната конверзија во готовина во евра не може да се гарантира.
Дигиталното евро ќе може да се користи насекаде во еврозоната, без разлика каде се наоѓаат плаќачите и која комерцијална банка или давател на платежни услуги го користат. Плаќањето ќе биде можно во секое време, 24 часа на ден, 365 дена во годината.
Без банкарски сметки
Дигиталното евро, исто така, ќе им овозможи на луѓето без банкарски сметки да вршат или примаат дигитални плаќања и да пристапуваат до основните функции бесплатно. Овие функции би вклучувале конверзија на готовина во дигитално евро и обратно. Во моментов, околу четири милиони луѓе во ЕУ немаат банкарска сметка, што ги става во неповолна положба бидејќи не можат, на пример, да ги користат услугите на е-трговијата.
Комисијата наведува дека дигиталното евро би ја подобрило приватноста на корисниците, а со користење на дигиталното евро без пристап до интернет, приватноста на корисникот би била иста како и при користењето готовина.
Од Комисијата наведуваат дека целта на денешните предлози е да се обезбеди оние кои тоа го сакаат и понатаму да можат да плаќаат во готово, така што е пропишана законска обврска за прифаќање готовина, со што, меѓу другото, би се спречиле компаниите еднострано да воведат исклучиво безготовински плаќања. Комисијата посочува дека дигиталното евро нема да ја замени готовината, туку ќе биде уште една дополнителна опција за плаќање.
Дигиталното евро ги загрижува банките, кои стравуваат од можна голема загуба на приходите доколку поединците почнат масовно да ги повлекуваат своите депозити од нивните сметки и да ги претвораат во дигитално евро, кое, за разлика од банкнотите и монетите, не би било во нивните биланси. Затоа, Комисијата предлага да се ограничи износот што секој поединец може да го држи во дигитална валута.
Извор: 360stepeni.mk
