БРИСЕЛ (АА) – Европската комисија денес даде зелено светло за најновата верзија на вакцината против Ковид-19 на Фајзер/БајоНТех, навреме за кампањите за имунизација во есенската и зимската сезона, јавува Анадолу.
Извршното тело на ЕУ објави дека одобрило „преработена вакцина против Ковид-19 Comirnaty XBB.1.5, развиена од БајоНТех/Фајзер“ со цел да им овозможи на земјите членки на ЕУ да се подготват „навреме за нивните кампањи за вакцинација есен/зима”.
„Ковид-19 ќе циркулира паралелно со сезонскиот грип во текот на претстојните есенски и зимски месеци“, предупреди еврокомесарката за здравство Стела Киријакидес.
Обновената вакцина „ќе ги има како цел новите и оние варијанти [на вирусот] кои се шират“, нагласи таа, повикувајќи ги сите жители на ЕУ да се вакцинираат.
Вакцината е третата адаптација на вакцината против коронавирусот на „Фајзер“ која реагира на најновите варијанти на вирусот.
Според препораката на Европската агенција за лекови, возрасните и децата на возраст над пет години треба да примат една доза без оглед на нивната историја на вакцинација.
