РИМ (АА) – Властите во Албанија и Италија разбија мрежа за шверц на дрога за која постои сомневање дека прошверцувала најмалку 2 тони кокаин од Јужна Америка во Европа, соопшти денес Европол, јавува Анадолу.
Операцијата доведе до апсење на 29 лица, речиси целосно во Италија. Како што се наведува, осомничените се товарат дека од ноември 2021 година во контејнери со егзотично овошје на бродови кои пристигнувале во европските пристаништа од Јужна Америка сокриле најмалку 2 тони кокаин, 20 килограми марихуана и 46 килограми хашиш.
Дрогата е запленета во различни операции, соопшти Европол.
Уапсените, предводени од двајца браќа Албанци, се обвинети и за дистрибуција на дрогата низ Европа.
„Кога дрогата пристигнувала во Европа, тимови ја земале дрогата од контејнерите и ја продавале на други криминални мрежи“, додаде Европол.
Службениците за спроведување на законот вчера извршија рација на локации во Албанија, Италија, Франција, Шпанија и Романија.
Истрагата за албанската криминална мрежа е започната во 2021 година на иницијатива на Јавното обвинителство на Фиренца во Италија, соопштија властите.
Истата година е формиран заеднички истражен тим меѓу италијанските и албанските власти.
Истрагата е поддржана од пресретнати комуникации меѓу криминалните организации, кои ја користеле шифрираната алатка за мобилна комуникација SkyECC, додаваат европските власти.
Извор: Anadolu Agency (AA)
