БРИСЕЛ (АА) – Високиот претставник за надворешна политика и безбедност на ЕУ, Жозеп Борел, во името на ЕУ, со писмено соопштение побара итна хуманитарна пауза за да се осигури дека сите деца во Газа ќе се вакцинираат против вирусот на детска парализа, известува Анадолу.
Во соопштението, истакнувајќи ја важноста од натамошна соработка на сите страни со Светската здравствена организација, Агенцијата за помош и работа на Обединетите нации за палестинските бегалци на Блискиот Исток (УНРВА) и УНИЦЕФ за спроведување и дистрибуција на вакцини, се нагласува:
„Посветеноста на сите страни во хуманитарната интервенција ќе биде клучна за да се обезбеди успешно и навремено спроведување на овие итни кампањи. Заштитата на здравствените установи и персоналот и осигурувањето безбеден пристап за децата и семејствата до центрите за вакцинација ќе биде од суштинско значење.“
Палестинското Министерство за здравство соопшти дека на 16 август во Деир ал Балах, Појасот Газа, е откриен случај на детска парализа кај 10-месечно дете.
Во соопштението објавено на 25 август палестинското Министерство за здравство наведе дека пристигнале вакцини против детска парализа и повика на притисок врз Израел да дозволи овие вакцини да влезат во Газа.
Агенцијата на Обединетите нации за помош и работа за палестинските бегалци на Блискиот Исток (УНРВА), Меѓународниот детски фонд на Обединетите нации (УНИЦЕФ), Светската здравствена организација (СЗО) и партнерите истакнаа дека е потребна хуманитарна пауза во конфликтот за да можат повеќе од 640.000 деца во Појасот Газа да се вакцинираат против детска парализа.
Извор: Anadolu Agency (AA)
