Ердоган им се извини на жртвите од земјотресот: Ве молам да ми простите

Тој ги призна „неуспесите“ во одговорот на земјотресите, додавајќи дека е „невозможно да се биде целосно подготвен за катастрофа од оваа големина“

Турскиот претседател Реџеп Таип Ердоган денеска побара „прошка“ од жителите на провинцијата Адијаман за доцното пристигнување на спасувачките тимови, со оглед на тоа што областа на југоистокот на земјата е меѓу најпогодените од земјотресот на 6 февруари.

„Поради разорниот ефект од двата земјотреси и лошите временски услови, не можевме да работиме како што сакавме во првите денови од катастрофата во Адијаман. За ова ве молам да ми простите“,

рече Ердоган при посетата на Адијаман.

Ердоган пристигна во тој град три недели по земјотресот кој ги однесе животите на повеќе од 50 000 луѓе во Турција и соседна Сирија. Турскиот претседател, кој е на власт 20 години и со амбиции да ја задржи функцијата по изборите на 14 мај, беше предмет на жестоки критики за бавноста на земјата во помагањето на жртвите.

„Толку многу згради и објекти беа уништени. За жал не бевме толку брзи како што се надевавме“,

рече Ердоган.

Тој ги призна „неуспесите“ во одговорот на земјотресите, додавајќи дека е „невозможно да се биде целосно подготвен за катастрофа од оваа големина“.

Во провинцијата Адијаман и Хатај луѓето изразија големо незадоволство од одговорот на властите на природната катастрофа. Мехмет Јилдирим тврди дека 34 часа по првиот земјотрес не видел „никого“, ниту државни претставници, ниту полиција или војска, тие биле „оставени сами на себе“.

Ердоган денеска вети дека ќе изгради околу 50 000 нови станови во Адијаман. Треба да се изградат околу 309 000 станбени единици во 11-те провинции погодени од разорните земјотреси.

Земјотрес со јачина од 5,2 степени според Рихтеровата скала утринава повторно ја погоди источна Турција, соопшти Европско-медитеранскиот сеизмолошки центар (EMSC).

Во земјотресот загина најмалкку едно лице, а 110 се повредени, соопштија турските власти. Во потресот се урнаа и 29 згради.

Денешниот земјотрес се случи три недели од првичниот земјотрес со јачина од 7,8 степени според Рихтеровата скала кој ги погоди Турција и Сирија на 6 февруари.