КАХРАМАНМАРАШ (АА) – Едно и полгодишното бебе Масал (од турски „бајка“) е спасено од под урнатините на станбена зграда во турскиот град Кахаманмараш, дури 55 часа по разорните земјотреси кои во понеделникот ги потресоа јужните региони на Туркије, известува „Анадолу“.
Бројни спасувачки екипи ги продолжуваат акциите за претрага и спасување во регионите погодени од разорните земјотреси.
Спасителите утрово слушнаа глас од под урнатините, по што ископаа тунел до местото каде што биле заглавени 1,5-годишната Масал и нејзината мајка Јелиз Кираччакли (23).
Спасувачката екипа со големи напори успеа да го извлече бебето на безбедно.
Во тек се напори за спасување и извлекување на мајката, која сѐ уште се наоѓа под урнатините и која на спасувачите им рекла дека со доење ја одржала ќерката во живот.
Таткото Омер Кираччакли на денот на земјотресот, со сопствени напори успеал да се извлече од под урнатините.
Камерите ја забележаа и многу емотивната средба меѓу таткото и неговата ќерка откако таа е спасена.
„Најмалку 8.574 лица ги загубија животите од последиците на разорните земјотреси кои во понеделникот ги погодија јужните региони на Туркије“, потврди претседателот на Туркије, Реџеп Таип Ердоган.
Од последиците на земјотресите и во соседна Сирија животот го загубија 2.530 лица, а 4.645 се повредени.
– Разорни земјотреси кои ја потресоа Туркије на 6 февруари
Два силни земјотреси, првиот со интензитет од 7,7 степени по Рихтер, во понеделникот наутро во 4:17 часот по локално време, со епицентар во округот Пазарџик и вториот во 13:24 часот, со интензитет од 7,6 степени по Рихтер, со епицентар во местото Елбистан, ги потресоа јужните делови на Туркије. Епицентрите на земјотресите се регистрирани во турската област Кахраманмараш.
И турските области Газиантеп, Шанлиурфа, Дијарбакир, Адана, Адијаман, Малатја, Османие, Хатај и Килис се тешко погодени од земјотресите. Во текот на денот имаше и голем број последователни потреси со помал интензитет.
Извор: www.aa.com.tr
