Торино донел одлука да не ја искористи опцијата за откуп на македонскиот репрезентативец Елиф Елмас, која беше договорена на 17 милиони евра со германскиот РБ Лајпциг. „Биковите“ ја оценија оваа сума како преголема, и покрај квалитетите на играчот.
Сепак, Елмас изразил желба да остане во Италија – првенство кое добро го познава и каде се чувствува пријатно, благодарение на своето претходно искуство со Наполи. По неговото враќање во Лајпциг, германскиот клуб ја зголемил цената и сега бара најмалку 20 милиони евра за негова целосна продажба.
Во вакви услови, се отвораат нови можности. Една од екипите која покажала сериозен интерес за Елмас според медиумите од Италија е амбициозниот Комо, клуб кој неодамна се врати во Серија А и има силна финансиска поддршка. Иако сумата што ја бара Лајпциг ја прави зделката сложена, желбата на Елмас да остане во Италија може да одигра клучна улога во олеснување на евентуалните преговори.
Следните денови ќе бидат клучни за иднината на македонскиот плејмејкер, кој и понатаму останува во фокусот на италијанскиот трансфер пазар.
Извор: kurir.mk
