Европската Унија во последните пет години постигна значителен напредок во намалувањето на емисиите на стакленички гасови и загадувањето на воздухот, но сепак се потребни повеќе напори за справување со климатските промени и деградацијата на животната средина, кои претставуваат големи ризици за економскиот просперитет, конкурентноста, безбедноста и квалитетот на животот во Европа.
Ова се наведува во Извештајот на Европската агенција за животна средина (ЕЕА) за состојбата во ЕУ со емисиите на штетни гасови и загадувањето во изминативе пет години објавен денеска.
– Водните ресурси на Европа се под сериозен притисок. Проблеми со водата моментално има на 30 отсто од територијата на Европа и за 34 проценти од населението. Затоа, спроведувањето на политиките и целите на ЕУ, како и преиспитувањето на врските помеѓу економијата и животната средина, се клучни за да се обезбеди здраво општество и конкурентна економија, се вели во Извештајот.
Во документот на ЕЕА се нагласува потребата од „климатско лидерство на ЕУ“ преку континуирано намалување на емисиите на стакленички гасови и на употребата на фосилни горива, како и преку значително зголемување на користењето на енергија од обновливи извори и подобрување на енергетската ефикасност.
Според извештајот, од 1990 година, па до сега, ЕУ ги намалила своите емисии на стакленички гасови за 37 отсто, а добар напредок е постигнат и во подобрување на квалитетот на воздухот, рециклирањето на отпадот, иновациите, зелените работни места и одржливото финансирање.
– Политиките на ЕУ за подобрување на квалитетот на воздухот резултираа со намалување на бројот на предвремените смртни случаи како резултат последици од вдишувањето ПМ честички од 2005 до 2022 година за 45 отсто, се наведува во Извештајот.
Во документот, со кој се опфатени 38 земји, се нагласува потребата од активности за продолжување на обновата на природата на Европа, заштитата на биолошкиот диверзитет и намалувањето на загадувањето, бидејќи „целокупната состојба на животната средина во Европа има потреба од понатамошно подобрување“.
– Заштитата на природните ресурси, ублажувањето и прилагодувањето кон климатските промени и намалувањето на загадувањето ќе придонесат за отпорноста на Европа. Европската Унија презема мерки за справување со овие предизвици и продолжува со својата работа кон чист, одржлив и отпорен континент, останувајќи на курсот кон своите климатски и еколошки цели, се додава во извештајот.
Извор: vecer.mk
