Дванаесетти протест „Србија против насилството“ во Белград

За разлика од претходните недели, на денешниот протест имало помала излезност поради најавите за невреме. Меѓу останатите, на денешниот протест во Белград се обратил и студент кој на протестот го прекинал петдневниот штрајк со глад кој го започнал на 17 јули поради игнорирањето на барањата од протестите од страна на власта

И покрај дождот кој вечерва го зафати Белград, граѓани излегоа на дванаесеттиот по ред протест „Србија против насилството“. Протестниот марш почна пред зградата на српскиот парламент, продолжи до седиштето на Регулаторното тело за електронски медиуми, а заврши пред зградата на Радио-телевизија Србија (РТС).

Учесниците на протестот, чии технички организатори се партиите од проевропскиот блок, бараат разрешување на сите членови на Советот на Регулаторното тело за електронски медиуми, затворање на медиумите кои го прекршуваат новинарскиот кодекс, одземање на националните фрекфенции на телевизиите Пинк и Хепи, како и смена на раководството на јавниот сервис РТС.

За разлика од претходните недели, на денешниот протест имало помала излезност поради најавите за невреме.

Српските медиуми јавуваат дека меѓу другите, на денешниот протест во Белград се обратил и студент кој на протестот го прекинал петдневниот штрајк со глад.

Димитрије Димиќ, студент на Правниот факултет во Ниш, на 17 јули го почнал штрајкот со глад пред Претседателството на Србија во Белград поради игнорирањето на барањата од протестите од страна на власта.

„Господине претседателе, ве молам како човечко суштество да ги исполните барањата од протестот. Народот ова нема да го толерира“,

рече Димиќ пред насобраните граѓани.

Протестите „Србија против насилството“, на покана на некои опозициски партии, се организираат еднаш неделно и ја претставуваат реакцијата на граѓаните и опозицијата на одговорот на државата по двете масовни убиства што се случија на почетокот на мај годинава.

Првите протести беа организирани на 8 мај во Белград, Нови Сад и уште неколку градови, непосредно по двете масовни убиства во кои загинаа 17 лица, главно деца и млади.

Власта тогаш ја обвини опозицијата дека со протестите ја политизира трагедијата.