Министерството за економија утре или најдоцна задутре треба да ја достави Предлог-одлуката за ограничување на маржите на основните прехранбени производи до Владата.
Министерот за економија и труд Бесар Дурмиши вечерва изјави дека ќе бидат опфатени производите од есенската потрошувачка кошничка надололнети со непрехранбени производи кај кои се забележани високи маржи.
-Ќе има околу 100 групи на производи. Ќе се додадат и непрехранбени производи затоа што анализата на Државниот пазарен инспекторат покажа дека има вакви производи каде е зголемена маржата. Одлуката ќе важи до 30 април и ќе бидат опфатени и двата големи празника – Велигден и Рамазан, рече Дурмиши во централниот дневник на телевизија „Сител“.
Дурмиши истакна дека анализата на Државниот пазарен инспекторат покажува дека трговците на мало користеле маржи од 5 до 20 проценти кај основните прехранбени производи и од 20 до 30 проценти бруто профитна маржа кај неосновните непрехранбени производи.
Најави дека утре или задутре ќе се одржи и состанокот со надлежните институции на кој ќе се разговара за мерките коишто би имале подолгорочен ефект.
Останува на ставот дека новогодишната кошничка дала ефекти, но дека имало трговци и дистрибутери кои ја изиграле со зголемување на цените на оние производи што не биле дел од новогодишната кошничка.
– Значи не дека новогодишната кошничка не даде ефекти, но не како што ние очекувавме, рече Дурмиши.
ИЗВОР: kurir.mk
