Какви се ефектите откако измина една недела од спроведувањето на акцијата наречена Новогодишна кошничка и дали со неа има реално намалување на цените. Министерот за економија Бесар Дурмиши во интервју за Радио Слободна Европа е задоволен од оваа акција. Вели дека се почитува мерката за намалување на цените на производи од 10 проценти
„Од првите денови анализите што ги правиме на терен секој ден Државниот пазарен инспекторат, гледаме дали ја почитуваат нивната мерка – која сами ја нудеа производителите, дистрибутерите и трговците. Се виде дека се почитува и е применлива, граѓаните овие први денови гледаме дека се задоволни од оваа мерка која беше иницијатива на трговците“, додава Бесар Дурмиши.
Тој вели дека засега граѓаните немаат пријавено неправилности, а истовремено додава дека и Државниот пазарен инспекторат досега не пронашол непочитување на акцијата.
„Јас и до крајот на мерката не верувам дека ќе има злоупотреба или изигрување на цените затоа што тоа самите трговци, производители и дистрибутери самите тие ја нудеа. Значи оа е иницијатива од нив, од коморите, која што ја поддржувавме ние како Влада“, порача Бесар Дурмиши.
Но од опозициската партија со спротивен став, тврдат дека овие мерки воопшти не влијае кон потрошувачката кошничка и дека тоа нема ефект по џебот на граѓаните а основните прехранбени производи наместо да се поевтини тие се поскапи. Кошничката е само една измама која ја прави премиерот Христијан Мицкоски рече Лолита Ристова од СДСМ.
„Власта на Мицкоски наместо нешто да преземе да се справи со овој сериозен проблем и да го поддржи стандардот на граѓаните, направи измама со таканаречената новогодишна кошничка. Го видовме истото сценарио – трговците прво ги покачија цените, а потоа мерките стапија во сила. Реалноста во маркетите и продавниците којашто граѓаните ја гледаат секој ден е дека цените не само што останаа високи, туку кај некои производи и дополнително се зголемија“, вели Лолита Ристова.
Акцијата новогодишна кошничка започна на 15 декември а ќе трае до 15 јануари идната година. Со неа се опфатени над илјада производи кои се намалуваат за 10 проценти.
ИЗВОР: ТВ 21
