Државниот завод за ревизија (ДЗР) утврди серија неправилности и недоследности во работењето на Спортско-рекреативниот центар „Борис Трајковски“ во Скопје, особено во врска со вложувањата поврзани со одржувањето на состанокот на ОБСЕ во 2023 година, затоплувањето на базенот и работењето на аква-паркот.
Во извештајот на ДЗР се посочува дека не постои евиденција за тоа што точно добил спортскиот центар од договорите склучени од Министерството за надворешни работи (МНР), кои се однесуваат на адаптацијата и уредувањето на објектот за потребите на меѓународниот настан. Според податоците, МНР спровело јавни набавки во вредност од над 124 милиони денари, но СРЦ „Борис Трајковски“ нема добиено записници за изведените работи и инсталираната опрема. И покрај склучениот договор за соработка меѓу институциите, не е утврдено што останало трајно во владение на спортскиот центар.
Ревизорите укажуваат и на проблеми со системот за загревање на базенот. Иако во 2014 година бил инсталиран соларен систем вреден речиси 26 милиони денари, неговата денешна вредност е значително намалена на околу 2,8 милиони. Системот функционирал со прекини сè до 2023 година, а поради сериозни технички недостатоци кај соларните панели, денес не е во функција и не е обезбедено соодветно решение.
Дополнителен проблем е и затворањето на аква-паркот, кој престанал со работа во 2024 година, откако истекол гаранциониот рок од 10 години на реквизитите, опремата и инсталациите. Ревизорите го посочуваат и економскиот аспект – одржувањето на аква-паркот станало финансиски неисплатливо.
ДЗР заклучува дека потребни се итни мерки за подобрување на управувањето со центарот и надминување на воочените пропусти, со цел заштита на јавните средства и обезбедување на ефикасно функционирање на овој значаен објект.
