Иако медиумите само пред еден месец објавија дека Исланд е единствената земја во светот без комарци, тоа веќе не е случај. Комарците се откриени на исландско тло за прв пат во историјата, со што Антарктикот е единствениот регион во светот кој сè уште е ослободен од овие непријатни и досадни инсекти.
Бидејќи Исланд се затоплува четири пати побрзо од остатокот од северната хемисфера поради климатските промени, ова води до топење на глечерите и почести топлотни бранови.
Во мај годинава, во оваа островска земја беше забележан најтоплиот ден досега, кога температурата се искачи на 26,6 степени. Во другите делови од земјата, температурите беа најмалку 10 степени повисоки од нормалните за пролет.
Се стравува дека брзото затоплување би можело да ги фаворизира комарците, кои на тој начин ќе се прошират низ мочуриштата на Исланд. Бјорн Хјатасон, кој ги проучува инсектите, верува дека наишол на три комарци во долината на глечерот Ќос, во близина на главниот град Рејкјавик, додека користел јаже натопено во вино за да ги набљудува молците. Тој ги сподели своите наоди на локална Фејсбук страница на 16 октомври, велејќи дека првиот инсект што го уловил бил „чудна мува“. „Веднаш можев да кажам дека е нешто што никогаш порано не сум го видел“, напиша тој.
Тој ги испратил трите инсекти во Институтот за природни науки во Исланд, каде што ентомологот Матијас Алфредсон потврдил дека станува збор за две женки и еден мажјак од видот Culiseta annulata.
Овие комарци се поотпорни на студ од другите видови и можат да се најдат дури и во Сибир.
Алфредсон рекол дека тие често бараат засолниште во затворени простори како амбари за да ги издржат посуровите зимски временски услови.
Експертот не е сигурен дали може само да ги обвини климатските промени за појавата на комарци во Исланд, но предупреди: „Зголемувањето на температурите ќе ја зголеми можноста други видови комарци да се населат на островот, доколку пристигнат.“
Исто така е можно инсектите да пристигнале од други земји преку бродови или контејнери.
Пред неколку години, комарец, од различен вид, бил пронајден во авион на меѓународниот аеродром Кефлавик.
Сепак, комарци никогаш не биле видени во дивината до пред неколку години. Потребни се понатамошни истражувања за да се утврди дали комарците „навистина“ се населиле во Исланд.
Извор: vecer.mk
