Идејата со уставни измени со одложено дејство не е нова, вели поранешниот министер за надворешни работи и поранешен вицепремиер за европски прашања Никола Димитров. Во гостувањето во „Дејли Клик“ запрашан дали се согласува со идејата на Мицкоски за ова, вели дека тоа требало да бидат црвените линии уште во 2021 година, кога имал, како што вели, бурни дебати со Зоран Заев и Бујар Османи.
-Тоа во 2021 година јас ги убедив Заев и Бујар, кога имавме координации, по прилично бурни дебати, дека мора да биде позиција на владата. Одложеното дејство е позиција и на владата на СДСМ и ДУИ 2021 година. Тоа што тие кон средината на 2022 година дигнаа раце од оваа позиција, е зошто се кабает за овој чвор и каша и фактот што сме на паркинг денес, изјави поранешниот МНР и вицепремиер, Никола Димитров.
Димитров вели дека минатата влада, во која и тој бил дел едно време, направила многу грешки по ова прашање, а за грешните политики го посочи и Бујар Османи кој дојде на негово место во министерството за надворешни работи.
-Неговата политика е грешка, не тој како личност. Политиката, решенијата, како ова го играше…Оти ние имавме ситуација кога Бугарија се жалеше и јавно како може да сте повеќе солидарни со земја кандидат, кога ние седиме со вас на масата. Ние сме земја членка и сојузници, до таму стигна во тој период, изјави поранешниот МНР и вицепремиер, Никола Димитров.
Димитров не е оптимист дека ќе има проширување на ЕУ во 2030-та година. Сепак, додава дека дали со уставни измени со одложено дејство, или со некоја друга формула, прашањето со Бугарија мора да се решава. Но, не смее тоа да биде главната агенда на новата власт, туку мора да се посветат и на реформите. Како што вели тој, кога и да биде новото проширување, државата треба подготвена да го пречека тој момент.
ИЗВОР: ТВ 21
