Министерката за финансии, Гордана Димитриеска-Кочоска, утре во Загреб ќе учествува на официјалната церемонија за потпишување на Меморандум за разбирање и соработка за развој на пазарот на капитал. Настанот е организиран од Министерството за финансии на Хрватска и обединува земји од Централна и Југоисточна Европа – Хрватска, Бугарија, Унгарија, Македонија, Полска, Романија, Словачка и Словенија.
Со потпишувањето на меморандумот, земјите ќе ја потврдат заедничката определба за унапредување на соработката во областа на пазарите на капитал преку подобрување на законодавството и регулативата, интеграција на инфраструктурата, дигитализација и хармонизација.
„Иницијативата има за цел да испрати силен сигнал до инвеститорите, пазарите и меѓународните партнери дека земјите од регионот се посветени на координирани и усогласени реформи, како и на создавање услови за долгорочен и одржлив економски раст,“ соопштија од Министерството за финансии.
Димитриеска-Кочоска ќе учествува и на министерски панел каде што ќе разменува искуства и добри практики со колегите од регионот. Министерството нагласува дека ова претставува потврда за заложбата на Македонија за продлабочување на регионалната економска соработка и зајакнување на довербата на инвеститорите.
