Државната изборна комисија (ДИК) денеска одржа седница на која ги утврди роковите за сите дејствија за Локалните избори 2025 година, откако претходно претседателот на Собранието, Африм Гаши го потпиша Решението со кое е предвидено изборите да се одржат на 19 октомври.
Онаму каде што ќе има потреба за втор круг, истиот ќе се одржи на 2. ноември.
Изборната кампања за првиот криг почнува на 29 септември во 00.00 часот и трае непрекинато до 17 октомври до 24 часот. За вториот круг изборната кампања трае до 31 октомври до 24 часот.
ДИК ќе достави писмено барање до Министерството за внатрешни работи за ажурирање на Избирачкиот список и за 48 часа МВР ќе треба да достави податоци. Од 23 август до 11 септември до 00.00 часот Избирачкиот список ќе биде ставен на јавен увид во сите подрачни одделенија и канцеларии на ДИК, каде граѓаните ќе може да ги проверат своите податоци. Избирачкиот список ќе биде заклучен најдоцна 15 дена по завршување на јавниот увид.
До 13 септември до 24 часот е рокот до кога ќе може да се поднесуваат листите на кандидати на учесници на изборите до општинските изборни комисии.
Најдоцна до 16 октомври, односно три дена пред изборите, сите подносители на листи со потврдени кандидати имаат право да достават предлози за овластени претставници односно набљудувачи на изборите до изборните органи – до ОИК и за набљудување на денот на гласање за избирачките одбори.
Најдоцна до 27 септември ќе се потпише Кодексот за фер и демократски избори.
ИЗВОР: ТВ 21
