Дел од информациите во јавноста во врска со мотивот за објавување на документите се дека тој изразувал скептицизам кон американската влада, но неговите пријатели, пак, тврдат дека Тешеира ниту бил свиркач ниту странски агент
Американецот Џек Тешеира (21), припадник на Националната гарда на Масачусетс, денеска ќе се појави пред суд откако вчера беше уапсен од агенти на ФБИ за протекување на доверливи воени документи од Пентагон поврзани со војната во Украина и други прашања поврзани со националната безбедност.
ФБИ го уапси Џек Териша вчера во неговата семејна куќа во Дајтон, Мсачусетс откако тој беше идентификуван како водач на група за онлајн-разговори каде првично биле објавени документите, а оттаму се проширија и на други социјални мрежи.
Младиот гардист се товари за неовластено објавување доверливи информации, а неговото изведување пред суд се очекува да се случи во Бостон, Масачусетс, подоцна во текот на денот.
Тешеира работел како ИТ специјалист во разузнавачкото крило на Националната гарда на Масачусетс.
Дел од информациите во јавноста во врска со мотивот за објавување на документите се дека тој изразувал скептицизам кон американската влада, но неговите пријатели, пак, тврдат дека Тешеира ниту бил свиркач ниту странски агент.
Онлајн групата каде првично беа објавени доверливите документи е именувана како Таг Шејкер Централ (Thug Shaker Central) и брои околу 20 до 30 луѓе кои споделуваат интерес кон оружје, расистички содржини и видео-игри.
Оттаму документите се проширија и на Твитер и Телеграм, кога Пентагон дозна за случајот.
Документите кои протекоа на социјалните мрежи сугерираат и детално изнесуваат информации за помошта што САД и НАТО и ја пружаат на Украина во војната со Русија, како и за проценките на американските разузнавачки служби поврзани со земјите сојузнички на САД.
Извор: 360stepeni.mk
