Денес, како дел од настанот „Кај мама и тато на работа”, децата на вработените во Генералната дирекција на Управата за јавни приходи (УЈП) ги посетија родителите на нивните работни места. Целта на посетата беше да ја почувствуваат работната атмосфера и да научат повеќе за функционирањето на оваа значајна институција, информираат од УЈП.
Децата имаа можност да посетат дел од секторите на УЈП, како и кабинетот на директорката м-р Елена Петрова, каде се запознаа со процесите на работа и со начинот на кој нивните родители ги исполнуваат своите професионални задачи.
Преку учење и тимска работа децата беа поттикнати активно да учествуваат во симулации на процесите на функционирање на компаниите и колкав дел на даноци уплаќаат во согласност со дејноста која ја вршат, а имаа и можност да разберат како собраните средства се користат за подобрување на јавните услуги и инфраструктурата во земјата.
Децата учесници на крај на работилниците предложија конкретни идеи за тоа како треба да се вложат собраните средства, давајќи приоритет на нови спортски сали, обновување на детските игралишта низ земјата, подобрување на условите и услугите во болниците, како и градење на нови брзи патишта.
Директорката на УЈП м-р Елена Петрова им посака добредојде на учесниците и им посака како идни носители на одлуки да продолжат љубопитно да учат, да се надградуваат и да се интересираат за важноста на приходите и нивната улога во подобрување на животот на граѓаните. Таа изрази надеж дека ќе израснат во млади лидери кои ќе придонесуваат за просперитетна иднина.
„Вашата љубопитност и креативноста која ја покажавте денес се вистинска инспирација за сите. Продолжете да ги следите вашите интереси, вложувајте во знаењето и вештините, бидејќи вие сте тие кои ќе продолжите во иднина да создавате промени, да го унапредувате квалитетот на живот и придонесете за раст и развој на Македонија. Бидете горди што учествувате во овој процес, бидејќи тоа значи дека веќе давате придонес за подобра иднина за сите нас. Потребни се луѓе како вас кои ќе ги носат важните одлуки за создавање на понапредно и поразвиено општество.“– истакна директорката.
На крајот од посетата директорката на учесниците им врачи сертификати и им се заблагодари за нивното учество и придонесот кој го дадоа со учеството во работилниците.
Настанот „Кај мама и тато на работа“ е во контекст на одбележување на празниците и последниот ден од зимскиот распуст на децата а ја потврдува важноста на вклучувањето на младите во образовни и креативни активности, кои ќе им помогнат да го разберат значењето на јавните институции и нивниот удел во развојот на земјата.
УЈП контуинирано врши едукативни работилници преку проектот „Фискална едукација на младите“, со кој средношколците од цела држава неколку години по ред имаат можност да добијат појасна претстава за тоа што претставува данокот и која е општествената придобивка од плаќањето на даноците.
ИЗВОР: kurir.mk
