Делегацијата на Европската Унија и мрежата Europe House годинава ќе го одбележат Денот на Европа со хуманитарна иницијатива посветена на жртвите и погодените од неодамнешната трагедија во Кочани.
На 25 мај, истовремено во седум градови низ земјата – Скопје, Струмица, Крива Паланка, Битола, Велес, Струга и Тетово – ќе се организира трка под мотото „Сите за Кочани – трчаме заедно!“. Целта на иницијативата е да се изрази солидарност и да се обезбеди директна помош за заедницата во Кочани.
Трката е отворена за сите граѓани, без оглед на возраста или физичката подготвеност. Како што посочуваат организаторите, акцентот не е ставен на спортските резултати, туку на заедничкиот чин на солидарност и поддршка.
Заинтересираните можат да се пријават преку платформата sitezakocani.mk, каде што можат да изберат град за учество. Сите средства собрани од котизациите ќе бидат донирани преку Црвениот крст на Северна Македонија, со цел да се обезбеди најнеопходната помош за погодените семејства и заедницата во Кочани.
Организаторите нагласуваат дека на 25 мај нема да се трча за медали или признанија, туку за заедништво, поддршка и вредностите што ја дефинираат современата европска идеја – солидарноста, човековото достоинство и заемната помош.
ИЗВОР: racin.mk
