САРАЕВО (АА) – Прославата на 1 март – Денот на независноста на Босна и Херцеговина, почна утрово со подигање на државното знаме на сараевскиот рид Хум, придружено со интонирање на националната химна, известува Анадолу.
На церемонијата присуствуваа претставници од различни нивоа на власта во БиХ.
Прославата на Денот на независноста на Босна и Херцеговина започна со подигање на знамето на Хум.
Граѓаните на Босна и Херцеговина го избраа патот на независноста на референдумот одржан на 29 февруари и 1 март 1992 година. Од 64 отсто граѓани со право на глас кои излегоа на гласање, на прашањето дали се за суверена и независна Босна и Херцеговина, држава на рамноправни граѓани и народи на БиХ – Муслимани, Срби, Хрвати и припадници на другите народи кои живеат во неа, 99,44 отсто гласале „за“.
Референдумот се одржа по препорака на Арбитражната комисија на Меѓународната конференција за Југославија (Бадинтеровата комисија), во завршната фаза од распаѓањето на поранешната Социјалистичка Федеративна Република Југославија (СФРЈ). На референдумот граѓаните на Босна и Херцеговина со големо мнозинство гласаа за суверена и независна Босна и Херцеговина, држава на еднакви граѓани и народи во која ќе ги уживаат сите права и слободи, без каква било дискриминација.
Независноста беше поддржана главно од Бошњаците и Хрватите, додека поголем број Срби го бојкотираа референдумот поради повикот на СДС (Српската демократска партија на Србите во Босна и Херцеговина) да не се гласа на референдумот.
Резултатите од референдумот беа прифатени на 6 март истата година во Парламентот на Босна и Херцеговина.
Референдумот беше пресвртница за Босна и Херцеговина, но и вовед во крвава војна која заврши во 1995 година со потпишувањето на Дејтонскиот мировен договор.
Власта на ентитетот Република Српска го оспоруваат овој ден, па затоа Денот на независноста на БиХ се слави само во ентитетот на Федерацијата Босна и Херцеговина.
Извор: Anadolu Agency (AA)
