Погребната церемонија, како што соопшти Ватикан, „ќе биде свечена, но трезвена“. Таа ќе се одржи в четврток во 9:30 часот изутрина на плоштадот Свети Петар
Македонската православна црква – Охридска архиепископија (МПЦ-ОА) најави дека нејзина делегација ќе присуствува на погребот на поранешниот папа Бенедикт Шеснаесетти кој ќе се одржи утре на плоштадот Свети Петар во Ватикан.
Во изјава за МИА, од МПЦ-ОА велат дека делегацијата што ќе присуствува на погребот е во состав на митрополитот тетовско-гостиварски, епископот Јосиф, придружуван од професорот на Богословскиот факултет, ѓакон Стефан Гоговски.
Погребната церемонија, како што соопшти Ватикан, „ќе биде свечена, но трезвена“. Таа ќе се одржи в четврток во 9:30 часот изутрина на плоштадот Свети Петар.
Иако претставници од повеќе христијански цркви најавија дека ќе имаат официјални претставници на литургијата за почесниот папа Бенедикт Шеснаесетти, Асошиејтед прес (АП) претходно деновиве објави дека бројот на делегации и верници присутни на погребот нема да биде ни приближен до оној од 8 април 2005 година, кога беше погребан папата Јован Павле Втори.
Погребот на папата Бенедикт Шеснаесетти, сепак, ќе остане запишан во историјата на црквата, но и на светот, како досега уникатен настан бидејќи еден папа (папата Франциск) ќе ги води мисата и погребот на друг папа, односно неговиот претходник.
Поранешниот папа Бенедикт Шеснаесетти почина на последниот ден од 2022 година на 95-годишна возраст.
Тој ја водеше Католичката црква помалку од осум години и во 2013 година стана првиот папа што поднесе оставка по Григориј Дванаесетти во 1415 година.
ИЗВОР: 360stepeni.mk
