Пред 6 месеци кога станаа дел од Владата, но и после тоа, функционерите од ВРЕДИ тврдеа дека ќе се обидат да ги спроведат уставните измени до декември, во спротивно може да го преиспитаат учеството во Владата. Декември дојде, остануваат уште 16 дена до крајот на месецот. Прашањето за уставни измени не е ниту на повидок. Еден од претседателите на ВРЕДИ, Арбен Таравари, повторува дека се посветени на евроинтегративниот пат на Македонија и дека тоа е неспорно, но ништо не може да се направи без ВМРО-ДПМНЕ бидејќи има 58 пратеници во Собранието.
-Не дека дадовме рок, туку инсистиравме, но ова беше првата точка, т.е. европскиот пат на Македонија, но мора да имаме предвид дека со секоја друга комбинација без ВМРО-ДПМНЕ, уставните измени нема да се направат, затоа продолжуваме да се трудиме да го најдеме најлесниот и највозможниот начин за што поскор почеток на преговорите , но да бидеме јасни и да испратиме порака дека ако ВМРО е против, мислам дека ВМРО е ЗА почеток, но ги има условите што ги даде пред изборите. Еден од условите е да се направат уставните измени, но тие да стапат на сила со продолжен рок, изјави Арбен Таравари од коалиција ВРЕДИ.
Премиерот Христијан Мицкоски, говорејќи за европскиот пат на земјата, вчера изјави дека пораките од Брисел не се јасни и се добива впечаток дека Македонија и Западен Балкан во моментов не се во фокусот на ЕУ.
Инаку, во вторник Мицкоски и Муцунски ќе заминат за Брисел каде ќе останат до четврток. Евроамбасадорот во земјава, Михалис Рокас, на прашањето дали Франција и Германија работат на таканареченото креативно решение со гаранции за деблокирање на евроинтеграцискиот пат, рече дека во моментов има многу дипломатски активности по ова прашање. Според Рокас, процесот на проширување е главен приоритет на новото раководство на Унијата.
Додека да се одржи целата оваа расправа, другиот партнер на Владата, Движењето ЗНАМ, најави дека утре и официјално до сите парламентарни партии ќе достави национална платформа за македонско национално единство и дефинирање на македонските национални црвени линии.
ИЗВОР: ТВ 21
