ШК Алкалоид со четврта победа во низа на Европскиот клупски куп, кој се одржува во Врњачка Бања, Србија, со учество на 84 најдобри екипи од Стариот Континент, уште еднаш го покажа својот потенцијал за успех на меѓународната сцена.
Овој пат совладан беше словенечкиот тим „ШК Тајфун“ од Љубљана. Иако победата од 3,5:2,5 важи за минимална, двата бода што шахистите на Алкалоид ги освоија со триумф во четвртото коло ги вбројува во европската елита каде што се наоѓаат само четири екипи со максимален учинок, односно осум бода за четири победи.
Прв својата партија ја заврши Велемајсторот Аравинд Читамбарам, искористувајќи ја невнимателноста на поранешниот Европски првак Иван Шариќ, и Алкалоид поведе со 1:0 во мечот. На третата табла Ју Јангји, со бели фигури одигра креативна партија со жртва на централен пешак за иницијатива, но сепак по долги маневри црниот успеа да ја одржи позицијата со реми завршеток. Очекувано, на првата табла, Ајрун Еригаиси со бели фигури, во комплицирана позициона партија, долго се обидуваше да дојде до позначајна предност, но противникот успеа да одржи реми.
Многу значајна победа извојува С.Л. Нарајан на петтата табла, против хрватскиот репрезентативец, Велемајсторот Анте Бркиќ. При водство на ШК Алкалоид од 3:1, уследи неочекуван пораз на Ји Веи со црни фигури на втората табла – уште од отварањето западна во тешкотии против Нодирбек Јакубоев, кој со репрезентацијата на Узбекистан освоија Олимписко злато 2022 година. Конечниот резултат беше поставен откако Александар Инѓиќ во тешка позиција по долга борба против Самвел Тер Сахакјан успеа да донесе половина поен за конечни 3,5:2,5 победа на Алкалоид.
Дека рангирањето согласно просечниот рејтинг е само индикација за потенцијалот на еден тим, беше докажано во останатите три дуели од четвртото коло, каде што најдобрите осум екипи играа меѓу себе. Прворангираните „СуперЧес“ од Романија доживеаја непријатно изненадување од петторангираниот тим „Туркиш Ерлајнс“ кој прокнижи победа од 4:2, при што уште еден поранешен „алкалоидовец“ блескаше на првата табла: Дмитри Андрејкин му нанесе пораз на индискиот велемајстор Гукеш, кој веќе следниот месец ќе биде предизвикувач за титулата светски шампион.
Слично беше и во дуелот на вториот турски клуб „Бајеган Пендик“ (четврти носител), кој беше поразен од „Нагиканижаи“ од Унгарија (осми носител), исто така со 4:2. Последниот дуел на водечките осум заврши со минимална победа од 3,5:2,5 на „Нови Бор“ од Чешка, откако благодарение на победата на ВМ Винсент Кејмер го скршија отпортот на „Ајка Сентименто“ од Унгарија.
Играчите на ШК Алкалоид ќе преноќат на првата позиција на табелата, а веќе утре во рамки на 5.коло ги очекува дуел со „Туркиш Ерлајнс“, додека „Нови Бор“ ќе игра со „Нагиканижаи“.
Извор: kurir.mk
