Претседателката Гордана Сиљановска-Давкова во честитката по повод големиот државен празник 2 Август – Илинден, порача дека Илинден е повеќе од празник, тој е сржта на македонската историја, срцето на Републиката и душата на државноста.
„Илинден е тежок и прекрасен ден, ден на неизмерна тага и радост, но и ден на болка и гордост!“, истакна Сиљановска-Давкова, нагласувајќи дека 2 Август ги симболизира двата Илиндена – Крушевскиот од 1903 година, кој ја роди идејата за Републиката, и АСНОМ-скиот од 1944 година, кој ја оживеа таа идеја преку државна конституција по победата.
Претседателката подвлече дека првиот Илинден бил искра и ослободителен крик, а вториот – пламен и реализација на народноослободителната борба. „Илинден е приказна што се пишува со крв и солзи, порази и победи“, рече таа.
Сиљановска-Давкова потсети дека Републиката не се наследува, туку се изборува и заслужува, а празникот нè обврзува да создадеме држава во која вреди да се живее, држава во која граѓаните ќе остануваат, а не ќе заминуваат.
„Илинден е пример за обединување заради заедничка цел и општо добро“, порача таа, упатувајќи тивка заклетва пред Никола Карев, Питу Гули, Даме Груев, Гоце Делчев и сите знајни и незнајни борци, дека нивната жртва никогаш нема да биде заборавена ниту засрамена.
„Драги потомци на славните илинденци, од срце ви го честитам Илинден, празникот над празниците. Нека е вековита македонската република! Нека ни е вечен Илинден!“, стои во честитката на претседателката.
ИЗВОР: ТВ 21
