Брзи измени на Законот за Судски совет кои ќе овозможат да се отповикаат членовите кои се таму назначени од Собранието – ова е една од опциите на власта, што ќе овозможи итна кадровска промена во Советот. Потврда пристигна од министерот за правда Игор Филков, кој додаде дека конечна одлука може да се очекува наскоро.
„Тоа е веќе разговарано и е на маса и го разгледуваме како една од опциите“, изјави Игор Филков, министер за правда.
Ваквата можност прв ја спомена премиерот Христијан Мицкоски пред еден месец, но оттогаш па наваму постоеја правни дилеми дали е законски изводлива. Од неговата партија уште немаат финален став како ќе го реформираат Советот, иако на почетокот од власта најавија и негово целосно распуштање, што предизвика жестоки критики.
„После негативниот Извештај на Судскиот совет во Собранието, се поведе една таква дебата, меѓутоа јавноста знае дека предвидовме распуштање на Судскиот совет и реформи во врска со неговата работа, а формата и начинот на којшто ќе биде спроведена тоа останува дополнително да го утврдиме“, изјави Миле Лефков од ВМРО-ДПМНЕ.
СДСМ пак, беше на став дека отповикувањето на петтемина членови назначени во Советот од страна на Собранието е чекор на власта кон целосна окупација на судството и најавија дека ќе се спротивстават на намерата. За измените, на власта би и биле потребни 80 пратеници „за“. Претседателот на Советот, Александар Камбовски, неодамна истакна дека е логично „оној кој те назначил да може да те отповика“, но, како што додаде, актуелното законодавство тоа не го овозможува.
ИЗВОР: ТВ 21
