Двајца мажи, на возраст од 39 и 31 година, се осомничени за обид за убиство во село Орешани, откако физички нападнале човек кој го сомничеле дека украл лубеници од нивно земјиште. Според информациите од Основното јавно обвинителство Скопје, против нив е покрената истрага за кривично дело насилство.
Инцидентот се случил на 24 јули, кога оштетениот се движел со свој автомобил од Петровец кон селото Таор. Осомничените го следеле со товарно возило, а кога тој влегол во дворот на куќата на својот внук во Орешани, насилно го извлекле од возилото и започнале да го тепаат.
„Едниот од осомничените користел тупаници и шамари, додека другиот извадил водоводџиски клешти и со нив продолжил да го удира додека оштетениот не изгубил свест“, велат од Обвинителството.
Жртвата е хоспитализирана на Клиниката за неврохирургија во Скопје и е во животозагрозувачка состојба. Насилството го видел и внукот на оштетениот, кој бил присутен во дворот, а од Обвинителството велат дека овој настан предизвикал чувство на страв и несигурност и кај сведокот и кај пошироката јавност.
Поради сериозноста на делото и опасноста од повторување или бегство, обвинителството побара од судот да им биде определен притвор на осомничените.
ИЗВОР: racin.mk
