ОВИЕДО (АА) – Потврдениот биланс на загинати во минатонеделните поплави во Шпанија се зголеми на 223, објави во петокот шпанскиот министер за транспорт Оскар Пуенте, известува Анадолу.
Сѐ уште за исчезнати се водат 78 лица, а пронајдените 48 тела допрва треба да се идентификуваат, објави шпанскиот министер за транспорт Пуенте на социјалната платформа Х.
Обилните дождови и поплави, кои на 29 октомври го претворија истокот и југот на Шпанија, особено Валенсија, во зона на катастрофа, овојпат ја погодија и Жирона.
Поплавата предизвикана од силниот дожд што синоќа започна во градот Кадакес во провинцијата Жирона на североистокот на Шпанија оштети најмалку 32 возила.
Во изјава за Радио Каталонија, градоначалничката на Кадакес, Пиа Серињана, изјави дека силниот дожд кој траел два-три часа, предизвикал сериозни штети.
Во меѓувреме, продолжува потрагата по 78 лица, кои се прогласени за исчезнати во Валенсија.
Надлежните соопштија дека продолжува идентификацијата на загинатите, информирајќи дека повеќе од 100 тела им се предадени на нивните семејства.
Повеќе од 17.000 полицајци, припадници на жандармеријата и војници продолжуваат да работат во регионот, барајќи тела во калта високи до два метри и на подземните паркинзи покриени со вода.
Во Шпанија, каде се води политичка дебата за поплавите, се бараат виновниците за големиот број загинати. Се смета дека автономната влада на Валенсија многу доцна на мобилните телефони испратила порака за предупредување од поплави.
Според прогнозите на Државната метеоролошка агенција, најавено е дека обилни врнежи и невреме се очекуваат на североистокот на Каталонија и во градот Кадиз, на југозападниот дел на Шпанија.
Извор: Anadolu Agency (AA)
