ИСТАНБУЛ (АА) – На британското панк-рап дуо „Боб Вилан“, кое во саботата ја предводеше публиката во скандирањата „Слободна, слободна Палестина“ и „Смрт, смрт за ИДФ (Израелски одбранбени сили)“ за време на нивниот настап на музичкиот фестивал во Гластонбери, може да му биде одбиен влезот во Соединетите Американски Држави (САД) поради неговите постапки, јавува Анадолу.
Според висок претставник на американскиот Стејт департмент кој говореше за „Дејли вајр“, тие „веќе размислуваат за одземање“ на визите на Боб Вилан пред турнејата низ околу 20 градови низ САД, со планирани настапи во неколку поголеми градови, меѓу кои и Вашингтон.
„За потсетување, под администрацијата на Трамп, американската Влада нема да издава визи на ниту еден странец кој поддржува терористи“, рече претставникот.
„Би-би-си“, која го емитуваше фестивалот во живо, и го пренесе настапот на „Боб Вилан“ без цензура, не го емитуваше настапот на ирската хип-хоп група „Никеп“, која исто така изрази пропалестински пораки во живо, повикувајќи се на уредничките упатства.
Портпаролот на „Би-би-си“ ги опиша коментарите дадени за време на настапот на „Боб Вилан“ како „длабоко навредливи“ и рече дека радиодифузерот нема планови да го направи настапот достапен на својата платформа за стриминг „iPlayer“.
Додека настапуваше на музичкиот фестивал во Гластонбери, вокалистот Боби скандираше „Слободна, слободна Палестина“, „Смрт, смрт за ИДФ“ и рече: „Да, од реката до морето, Палестина мора да биде, ќе биде, иншалах, ќе биде слободна“, додека беше на сцената.
По настапот, „StopAntisemitism“, приватно финансирана американска организација, побара на членовите на „Боб Вилан“ да им бидат одземени визите пред концертите во САД во рамките на нивната турнеја „Инерција“. Тие моментално имаат закажани концерти во повеќе од десетина поголеми градови во САД.
„На овој антисемит мора да му биде одбиена/поништена визата – неговата омраза не е добредојдена тука“, напиша StopAntisemitism на X, мислејќи на Боби.
Извор: Anadolu Agency (AA)
