ЛОНДОН (АА) – ЗУХАЛ ДЕМИРЏИ –
Британскиот актер, добитник на Еми, Тобајас Мензис, кој го глуми сопругот на кралицата Елизабета, кралот Филип во ТВ-серијата „Круната“ за британското кралско семејство, изјави дека ситуацијата во Газа е потресна и дека сликите од убиените во израелските напади ги растажуваат многу, јавува Анадолу.
Мензис, кој на светската јавност ѝ е познат по улогите во ТВ-сериите „Игра на тронови“ и „Круна“, за Анадолу зборуваше за ситуацијата во Газа и прати порака до жителите на Газа.
Тој во саботата во Лондон, главниот град на Велика Британија, учествуваше на „тивок марш“ организиран од здравствените работници за Палестина, а во таа пригода изјави дека и самиот сакал да се солидаризира со здравствените работници, од кои многумина ги загубија животите во Газа.
„Ова е нешто што многу ми значи. Во последниве години работев одредена работа за хуманитарната организација ‘Медицинска помош за Палестинците’ и бев на Западниот Брег минатиот февруари. Бев со медицински работници на окупираните територии“, рече Мензис.
Тој потсети дека поради израелските напади врз Газа во изминатите недели оштетена е медицинската инфраструктура во регионот и дека загинале многу здравствени работници. На тоа, како што рече, не може да се остане рамнодушен.
Запрашан како се чувствува кога ги гледа сликите на убиените во Газа, Мензис рече: „Тие слики многу ме растажуваат. Затоа денес сакав да дојдам овде. Оваа ситуација во голема мера ја загрозува иднината на луѓето во Газа и го отежнува обезбедувањето медицинска помош за ранетите цивили. Ова што се случува е многу вознемирувачко.“
На прашањето за коментар за воведувањето цензура на познатите личности што ја поддржуваат Палестина и дали се плаши дека и самиот ќе биде подложен на цензура поради поддршката на Палестина, Мензис одговори:
„Мислам дека сето ова е лична одлука. Мислам дека минуваме низ многу тежок период на политички план. Тешко е да се биде на страната (на Палестина во услови на цензура), но јас чувствувам многу јасно дека навистина е важно да се разговара за основните прашања на меѓународното право во контекст на тоа како се водат конфликтите.“
Истакнувајќи дека на крајот ќе биде потребно решение во регионот и дека тој поддржува долгорочно решение, Мензиз истакна: „Мислам дека кршењето на меѓународното право (во Газа) нема да биде од корист за никого“.
Познатиот актер нагласи дека за решавање на долгогодишниот политички судир во регионот, прво мора да престанат нападите врз Газа, за на цивилите да може да им се достави помош, особено храна, вода и медицинска помош.
„Сето ова треба да се случи во краток рок, а на крајот мирното решение е првиот чекор кон изнаоѓање политичко решение. Со војна не може да се најде решение. Оваа одлука мора да биде политичка“, порача Мензис и заклучи:
„Ова е многу вознемирувачка ситуација. Сакам да кажам дека ми е многу жал. Ние сме навистина солидарни со нив и ја чувствуваме нивната болка. Толку многу деца, семејства, цивили се погодени од овој конфликт и да се гледа сето тоа е срцепарателно.“
Извор: www.aa.com.tr
