БОГОТА (АА) – Владата на претседателот Луиз Инасио Лула да Силва во Бразил најави дека ќе се креира национална политика против насилството откако четири деца беа убиени во нападот на градинката на 5 април, јавува Анадолу.
Министерот за образование Камило Сантана им соопшти на новинарите дека треба да се подготви „национална политика за борба против насилството во училиштата“ и додаде дека тоа ќе го организира меѓуресорската работна група во рок од 90 дена.
Истакнувајќи дека ќе биде одреден неделен распоред на состаноци на кој ќе се разговара за среднорочни и долгорочни акции за борба против насилството, министерот Сантана најави дека ќе се спроведе поголемо следење на социјалните мрежи за да се откријат сите видови криминални дејства.
Министерката за здравство Нисија Триндад изјави дека заедно со развојот на алатки за комуникација има и зголемување на ваквите акти на насилство и додаде: „Заедничката борба е од суштинско значење за градење култура на мир во училиштата.“
Министерот на Генералниот секретаријат на бразилското Претседателството, Марсио Маседо, изјави дека пред медиумите стои голема одговорност да спречат сторителите на ваквите напади да бидат прикажани како херои.
Според официјалните извештаи, 40 ученици и наставници ги загубиле животите во нападите извршени во бразилските училишта во последните 20 години.
Четири деца ги загубија животите, а три се ранети во вооружениот напад извршен во градинка во градот Блуменау, сместен во јужниот дел на Бразил.
– Во последните два напада загинаа пет лица –
На 27 март, во бразилската држава Сао Паоло, ученик изврши напад со нож во едно училиште, при што уби еден наставник и рани четири лица.
На 25 ноември 2022 година, четири лица беа убиени кога 16-годишен ученик изврши напади во две училишта во Аракруз, во бразилската држава Еспирито Санто.
Извор: www.aa.com.tr
