Борисов, Петков и Радев со свои пораки откако гласаа на вонредните парламентарни избори во Бугарија

Во Бугарија денеска се одржуваат петтите вонредни парламентарни избори за помалку од две години. По гласањето Бојко Борисов рече дека од утре почнува тешкото, Кирил Петков дека гласал бидејќи се зависи од секој поединец, а Румен Радев смета дека легитимитетот на следниот парламент и влада зависи од излезноста на гласачите

Денеска е лесно, од утре ќе биде тешко, изјави лидерот на ГЕРБ, Бојко Борисов по гласањето во средното училиште „Христо Смирненски“ во софиската населба Банките, на денешните вонредни парламентарни избори во Бугарија, петти во последните две години, пренесе БТА.

„Тешко ќе биде утре и задутре со оваа галопирачка инфлација, цени, огромни долгови“,

објасни тој.

Борисов кажа дека на денешното изјаснување очекува поголема излезност на гласачите. Но, нагласи дека од тоа што го гледа досега ќе треба многу мудрост од политичарите. Изборите, според него, се единствениот излез од кризата. Борисов е убеден дека мора да има влада „ако не сакаме како народ да се самоубиеме“.

Според него, катастрофа за државата ќе биде доколку не може да се формира владејачко мнозинство. Затоа, тој е подготвен на компромис. Според лидерот на ГЕРБ, прво мора да се формира силна коалиција. Пред да се формира влада, не може да се разговара за никакви приоритети, додаде тој. Борисов потврди дека ќе биде пратеник додека се водат преговори за кабинет.

Копретседателот на „Промените продолжуваат“ и еден од лидерите во коалицијата „Промените продолжуваат – Демократска Бугарија“, Кирил Петков изјави дека гласал за нормален европски живот, нормална европска влада, нормални европски патишта, европско здравство, нормално европско образование.

„Гласав затоа што сфаќам дека нема спасител, се зависи од секој од нас“,

рече тој.

Петков кажа и дека денеска гласал бидејќи не сака неговите две ќерки да одат да студираат во странство.

„Сакам мојата трета ќерка да се врати и да може да работи во Бугарија, сакам кога ќе ги видам моите пријатели во Варна да не патувам пет часа, туку да патувам три часа, сакам кога патуваме низ Европа да не се чувствуваме како луѓе од втора категорија – да ни ги проверуваат документи на секоја станица“,

додаде поранешниот бугарски премиер.

Претседателот на Бугарија, Румен Радев, пак, кој своето право на глас го оствари во Софија, изјави дека очекува во бугарската политика конечно да надвладеат разумот и принципите, кои на прво место ќе ги стават интересите на граѓаните и иднината на државата.

„Најважно е денеска да се гласа. Ја користам оваа прилика да ги повикам Бугарите да излезат и да гласаат за да не дозволат некој друг да одлучува за нив. Легитимитетот на следниот парламент и влада зависи од излезноста на гласачите, од кои очекуваме важни одлуки“,

посочи тој.

Во Бугарија денеска се одржуваат петтите вонредни парламентарни избори за помалку од две години. Последните истражувања на јавното мнение кај источниот сосед покажуваат дека на денешните избори нема да има јасен победник.

Насловна фотографија: EPA-EFE/VASSIL DONEV