Борис Писториус е новиот германски министер за одбрана

Писториус ја наследува Кристин Ламбрехт, која вчера поднесе оставка откако со месеци се соочуваше со критики во врска со испраќањето оружје на украинската војска

Досегашниот министер за внатрешни работи на германската покраина Долна Саксонија, 62-годишниот Борис Писториус, ќе стане нов сојузен министер за одбрана.

Писториус ја наследува Кристин Ламбрехт, која вчера поднесе оставка откако со месеци се соочуваше со критики во врска со испраќање оружје на украинската војска.

Борис Писториус ја извршуваше функцијата министер за внатрешни работи и спорт на Долна Саксонија од 2013 година.

Предходно тој беше на позиции на локално ниво, вклучително и како градоначалник на Оснабрик, град во северозападната германска покраина Долна Саксонија.

Писториус е популарен во својата држава. Тој е член на извршната власт на партијата СПД и неколкупати бил на функции на сојузно ниво.

Првата точка од распоредот на следниот германски министер за одбрана ќе биде дали да испорача напредни борбени тенкови во Украина, изјави денеска германскиот министер за економија Роберт Хабек.

„Кога ќе биде назначен нов министер за одбрана, тоа ќе биде првото прашање за кое треба да донесе конкретна одлука“,

изјави Хабек за германското национално радио „Дојчландфунк“.

Германската министерка за одбрана Кристин Ламбрехт вчера поднесе оставка, во време кога владата во Берлин е под зголемен притисок да дозволи испраќање борбени тенкови во Украина. Германската влада се соочува со обновени апели да испрати тенкови „леопард 2“, кои Украина ги смета за клучни ако сака да ја победи Русија или барем да одобри нивна испорака од други земји, како што е Полска. Варшава е јасна за својата намера да снабдува борбени тенкови, но бара дозвола од Германија како земја на производство.