ВАШИНГТОН (АА) – Високиот претставник на Европската Унија (ЕУ) за надворешна политика и безбедност, Жосеп Борел, изјави дека она што е во прашање денес во Газа е дали луѓето ќе преживеат или не, известува Анадолу.
Американскиот државен секретар Ентони Блинкен се состана со Борел во Вашингтон и даде проценка за најновата ситуација во Газа и што може да се стори по прашањето за хуманитарната помош.
Борел и Блинкен пред состанокот дадоа кратки изјави и наведоа дека ќе разговараат за областите на соработка меѓу САД и ЕУ по прашањето за Газа.
Заблагодарувајќи се на напорите на САД во хуманитарната помош, но истакнувајќи дека тоа не е доволно, високиот претставник на ЕУ, Борел, рече:
„Жалиме поради моменталната ситуација во Газа, но мораме да сториме повеќе од жалење. Мораме да преземеме акција. Она што е во прашање денес во Газа е дали луѓето ќе преживеат или не.“
Истакнувајќи дека помошта што се испраќа во Газа по воздушни, морски и копнени патишта е недоволна, Борел рече дека најважно е да се отворат копнените граници и да се почне да се работи на дводржавно решение, кое го поддржуваат САД и ЕУ.
Блинкен наведе дека со Борел ќе разговараат за многу теми што се однесуваат на Украина, Газа, Кина и Западен Балкан, и дека заеднички делуваат со ЕУ, особено кога станува збор за хуманитарната помош во Газа.
Извор: Anadolu Agency (AA)
