АТИНА (АА) – Европската унија (ЕУ) би требало да покаже солидарност со Италија додека оваа земја се бори со зголемениот прилив на мигранти и бегалци на своите јужни брегови, изјави денес високиот претставник на Европската унија за надворешна политика и безбедност, Жосеп Борел, пренесува Анадолу.
Во интервју за Радио Франција Интернационал, Борел рече дека Европската унија „мора да ја покаже својата солидарност со Италија во овој тежок момент“.
„Европската унија ќе биде покрај Италија“, додаде Борел.
Борел во петокот, во интервју за британскиот „Гардијан“ предупреди дека ЕУ се бори со продлабочување на поделбата околу политиката за миграции, што потенцијално би можело да ја загрози кохезијата на блокот.
Оваа година во Италија пристигнаа над 127.000 мигранти, што е речиси двојно повеќе од истиот период 2022 година.
