КАИРО (АА) – Египетскиот претседател Абдел Фатах ал Сиси денес предупреди на предизвиците без преседан во регионот на Блискиот Исток во услови на војни и конфликти, јавува Анадолу.
„Континуираната израелска војна против палестинскиот народ претставува предизвик за меѓународните резолуции за легитимност“, изјави Сиси во својот воведен говор на самитот на Организацијата за економска соработка Д-8 во Каиро.
Израел започна геноцидна војна врз Газа во која се убиени речиси 45.100 луѓе, главно жени и деца, од нападот на Хамас на 7 октомври 2023 година.
Немирите што произлегуваат од израелската војна се проширија во Либан, Сирија и Јемен во услови на зголемени регионални тензии.
Меѓународниот кривичен суд минатиот месец издаде налози за приведување на израелскиот премиер Бенјамин Нетанјаху и поранешниот министер за одбрана Јоав Галант за воени злосторства и злосторства против човештвото во Газа.
Египетскиот лидер рече дека Египет планира да потпише преференцијален трговски договор со земјите членки на Д-8.
Ваквите договори даваат повластен пристап до одредени производи од земјите учеснички.
Денес во египетскиот главен град Каиро започнa самитот на Организацијата за економска соработка Д-8, на кој учествуваат и турскиот претседател Реџеп Таип Ердоган, иранскиот претседател Масуд Пезешкијан и пакистанскиот премиер Шехбаз Шариф.
На самитот, кој се одржува на тема „Инвестирање во младите и поддршка на малите и средните претпријатија: обликување на утрешната економија“, треба да се одржи специјална сесија за ситуацијата во Палестина и Либан, со учество на палестинскиот претседател Махмуд Абас и либанскиот премиер Наџиб Микати.
Групата Д-8 е основана во Истанбул во 1997 година за да ги зајакне економските и социјалните односи меѓу нејзините земји членки – Туркије, Египет, Нигерија, Пакистан, Индонезија, Бангладеш, Иран и Малезија.
Извор: Anadolu Agency (AA)
