Белград: Делот од училиштето каде што се случи масакрот целосно ќе се реконструира, ќе има и меморијален центар

Одговарајќи на прашање за меморијалниот центар, министерот Благојевиќ рече дека тоа е тема на разговор со родителите и учениците, како и со семејствата на жртвите и ќе се направи она што ќе биде договорено, но извесно е дека дел од школото ќе биде пренаменет за таа цел

Српските власти најавија дека за два дена (на 6 јули) почнува реконструкција на дел од училиштето „Владислав Рибникар“ во Белград каде што пред два месеца 13-годишен ученик го уби школскиот чувар и девет деца, а рани шест ученици и наставничка.

Министерот за јавни инвестиции на Србија, Марко Благојевиќ, за РТС најави дека реконструкцијата почнува и таа ќе опфаќа целосна санација: ѕидовите, подовите, осветлувањето, столаријата, тоалетите. Сè што е неопходно, вели тој, за децата да може да посетуваат настава во пристојни услови.

За зафатот српските власти ќе потрошат 18 милиони динари (околу 150 000 евра).

„Станува збор за зафати кои реално е можно да се изведат за ова време кое ни преостанува до почетокот на училишната година. Во прашање се нешто помалку од два месеца и тоа се работи за адаптација и санација на ентериерот на тој дел од училиштето“,

вели министерот Благојевиќ за РТС.

Според најавите, делот од училиштето во кој се случи масакрот најверојатно ќе биде претворен во меморијален центар, а дел ќе биде наменет за настава.

Одговарајќи на прашање за меморијалниот центар, министерот Благојевиќ рече дека тоа е тема на разговор со родителите и учениците, како и со семејствата на жртвите и ќе се направи она што ќе биде договорено.

„Извесно е дека ќе се направи меморијалниот центар“,

вели министерот.

Во ова школо учат 1 100 ученици, распоредени се во 42 паралелки од прво до осмо одделение. Со реконструкцијата и пренамената на дел во меморијален центар, како што уверуваат надлежните, ќе има доволно простор за сите ученици.

Од масакрот во училиштето поминаа два месеца, по што учебната година беше завршена порано, а едно од барањата на родителите беше целосно да се реконструира училиштето со цел од септември наставата да се одвива вообичаено.