ВАШИНГТОН (АА) – Белата куќа денес негираше каква било улога во серијата експлозивни напади во Либан, кои таргетираа илјадници комуникациски уреди два дена по ред, при што загинаа најмалку 26 луѓе, а повредени се 3.250, јавува Анадолу.
Портпаролот на Советот за национална безбедност, Џон Кирби, рече дека Соединетите Американски Држави (САД) „не се вмешани во вчерашните или денешните инциденти на ниту еден начин“.
Ниту една страна не ја презеде одговорноста, а нападите повторно го покренаа сеништето за војна меѓу Хезболах и Израел. Многу уреди, како пејџери и воки-токи, беа користени од припадници на Хезболах, кој функционира и како паравоена и како политичка група со огромни социјални услуги во Либан.
„Прерано е да се знае што ќе значат овие инциденти за веќе високите тензии меѓу Израел и Хезболах на таа граница“, рече Кирби.
„Сè што можам да ви кажам е дека пред неколку дена, Амос Хохштајн, нашиот пратеник, беше во регионот за разговори со цел да направиме сѐ што можеме од дипломатски аспект за да спречиме тие тензии да ескалираат во сеопфатен конфликт.“ додаде тој.
Експлозиите се случуваат во период на повеќемесечни прекугранични напади меѓу Хезболах и Израел, паралелно со бруталната израелска офанзива на Појасот Газа, во која досега загинаа речиси 41.300 луѓе, главно жени и деца.
Војната беше поттикната од прекуграничниот напад на 7 октомври, предводен од Хамас врз Израел, во кој загинаа 1.189 луѓе, а околу 250 се однесени во Газа како заложници.
Извор: Anadolu Agency (AA)
