Кирби рече дека претпоставува оти Украина почнала да ги користи касетните бомби изминатата недела и оти всушност веќе имаат влијание врз руските формации
Украинските сили „соодветно“ и „ефикасно“ ја користат касетната муниција против Русија, а која им ја обезбедија САД, изјави портпаролот на Советот за национална безбедност на Белата куќа, Џон Кирби, потврдувајќи дека Украина почнала да го користи ова оружје.
„Тие (касетната муниција) ја користат соодветно. Ја користат ефикасно и всушност имаат влијание врз одбранбените формации на Русија и нејзините одбранбени маневри“,
им рече Кирби на новинарите, пренесе „Си-ен-ен“.
Прашан кога почнала Украина да ја користи касетната муниција, тој одговори дека претпоставува дека тоа се случило во последната недела.
Официјалната потврда од Кирби следува откако претходно неколку американски медиуми објавија дека Украина почнала да ја користи касетната муниција.
За потсетување, САД на 8 јули објави дека ќе испратат од ова контроверзно оружје во Украина, а една недела по објавата тоа и беше испорачано. Касетната муниција позната и како касетни бомби се очекува да им овозможат на украинските сили да таргетираат поголеми мети меѓу руските сили, а притоа да користат помалку истрели.
Оваа муниција претставува канистер кој во себе носи десетици до стотици мали бомби, наречени подмуниција. Канистрите можат да бидат исфрлени од авион, испалени во проектил или од артилерија, бродски топови и ракетни фрлачи.
Кога канистерот ќе ја достигне програмираната височина или локација, тој се отвора и од него излетуваат малите бомби. Тие, пак, зависно од видот, експлодираат при контакт со тлото или, пак, се темпирани, со одбројување. При експлозијата, секоја мала бомба исфрла огромен број шрапнели во сите правци. Целта на касетната муниција, вообичаено, е да онеспособи пешадиски единици или тенкови.
Извор: 360stepeni.mk
