Високите цени на бебешките пелени за еднократна употреба и зголемувањето на сиромаштија кај самохраните родители, обедини педесетина невладини организации кои преку петиција бараат од Владата и ресорното Министерство за социјална политика, демографија и млади да побараат државата да ги рефундира овие трошоци. Велат, има наплив од барања за помош и веќе невладините не можат во потполност да помагаат.
„Ние работиме со 10 до 15 илјади случаи низ Македонија јас отворено ви кажувам дека бебешката исхрана, бебешките пелени, цените се зголемија за 100 до 150 посто и една самохрана мајка не може да го издржи тој товар и мора државата веќе конечно да излезе во пресрет на оваа петиција, на оваа ситуација.“, додава Владимир Чолаковски.
Според Чолаковски, само во скопскиот регион во моментов има над 100 барања за помош во бебешки пелени за еднократна употреба. Ако се прифати петицијата, која би требало да опфати не само самохрани, туку и социјално загрозени семејства со новороденчиња, би се формирала комисија во која би биле претставници на владата и на невладините кои ќе ги разгледуваат барањата и би решавале кој би можел да ја користи помошта.
Заменик министерот за социјална политика, демографија и млади Ѓоко Велковски вели дека во моментов нивниот систем за социјална заштита не препознава самохран родител, туку сите се водат како социјално загрозени семејства. Смета дека петицијата ќе биде можност да се унапреди системот за да може подобро да ги препознава потребите на граѓаните.
„Ќе ја разгледаме секоја иницијатива која ќе биде пристигната и се што е возможно да биде дел од системот. Секако зависи и во даден момент кога ќе се имплементира и од финансиски средства и слично, меѓутоа како иницијативи е добро да ги имаме за да може да разговараме на конкретни теми како што е оваа.“, вели Ѓоко Велковски.
Инаку, според последните податоци на Заводот за статистика, во 2021 година дури половина од самохраните родители со издржувани деца се сиромашни. Односно ако е самохран родител и едно дете, тие живеат со максимум 13.000 денари месечно. Според истражувања на невладини организации, дури 80 отсто од самохраните родители се жени.
ИЗВОР: ТВ 21
