На светскиот рекет број еден Новак Ѓоковиќ му е забранет влез во САД бидејќи нема примено вакцина против ковид-19, па затоа изгледа ќе ги пропушти мастер турнирите во Индијан Велс и Мајами.
Ѓоковиќ поднел документација и побарал посебна дозвола за влез во САД бидејќи не е вакциниран, но сенаторот Рик Скот од Флорида денеска на твитер-профилот објави дека неговото барање било одбиено.
„Ни беше кажано дека барањето на Ѓоковиќ е одбиено и тој нема да може да учествува во Мајами следната недела. Претседателот Џо Бајден мора веднаш да го поправи тоа и да му дозволи да игра во нашата земја“,
напиша Скот.
Владата на Австралија годинава му дозволи на Ѓоковиќ да се натпреварува на Австралија опен, откако минатата годин,а како резултат на немањето вакцина, му беше забранет влез во земјата и настап на турнирот. Годинава, австралиското Министерство за имиграција издаде соопштение за одлуката на министерот Ендрју Гилс да ја смени одлуката на неговиот претходник Алекс Хок кој во јануари годинава ги искористи своите овластувања и врз основа на „јавен интерес“ му ја укина визата на Ѓоковиќ.
Така, на најдобриот српски тенисер автоматски му се отстрани тригодишната забрана за влез во Австралија, по што заигра на Австралија опен и го освои турнирот по десетти пат.
Извор: 360stepeni.mk
