ВАШИНГТОН (АА) – Американскиот претседател Џо Бајдеn нареди знамињата во Белата куќа и во сите федерални згради да бидат спуштени на половина копје до зајдисонце на 31 март, по пукањето во училиште во кое животот го изгубија три деца и три возрасни лица, јавува Анадолу.
Бајден во писмена изјава рече дека го презел овој потег „како знак на почит кон жртвите на бесмислените акти на насилство извршени на 27 март 2023 година во Нешвил, Тенеси“.
„Исто така, дадов наредба знамето да биде спуштено на половина копје во исто време во сите амбасади, дипломатски мисии, конзуларни претставништва на Соединетите Американски Држави и во други објекти во странство, вклучително и сите воени објекти и поморски бродови и станици“, додаде тој.
Три деца и тројца возрасни беа убиени во приватното христијанско основно училиште во Нешвил, Тенеси, соопштија вчера претставници на органите за спроведување на законот додека САД се борат со уште едно ужасно пукање во училиште.
Тешко вооружениот напаѓач, 28-годишната Одри Хејл, поранешна ученичка на училиштето Ковенант, која се идентификуваше како трансродово лице, беше застрелана за време на престрелката со петчлениот полициски тим ангажиран на вториот кат во училиштето Презвитеријан, кое е поврзано со црква, соопштија властите.
Бајден за новинарите изјави дека тоа е „најлошиот кошмар на едно семејство“, повторувајќи го својот апел до Конгресот да усвои забрана за оружје за напад.
Извор: www.aa.com.tr
