МОСКВА (АА) – Азербејџанскиот претседател Илхам Алиев одби да присуствува на утрешниот состанок за Карабах во Гранада, Шпанија, на кој се очекуваше присуството на ерменскиот премиер Никол Пашинјан и лидерите од Европската Унија, Франција и Германија, јавува Анадолу.
Азербејџан инсистираше на присуството на Туркије, но Германија и Франција силно се спротивставија, објавија денес (среда) азербејџанските новински агенции, цитирајќи извори од претседателската администрација.
Официјален Баку соопшти дека не ја гледа потребата да учествува во преговори од овој формат по проерменските изјави на француските официјални претставници, посетата на француската министерка за надворешни работи Кетрин Колона на Ерменија, изјавите за снабдување со оружје и муниција и обвинувањата од претседателот на Европскиот совет, Шарлс Мишел, против Азербејџан.
„На Азербејџан не му треба таков формат. Баку не гледа потреба да разговара за проблемите од регионот со земји што се далеку од регионот“, истакна азербејџанското Претседателство.
Беше предложено за прашањата за Карабах да се дискутира и да се решаваат во рамките на регионот, како и дека Азербејџан ќе учествува доколку се оживее претходниот трилатерален формат на дијалогот ЕУ-Азербејџан-Ерменија.
„Секој формат во кој учествува Франција е неприфатлив за Азербејџан“, се нагласува.
Азербејџанската војска започна антитерористичка операција во Карабах на 19 септември за воспоставување уставен поредок во регионот.
Илегалните ерменски вооружени сили во Карабах се предадоа по 24-часовната операција.
По операцијата, Азербејџан, по воспоставувањето целосен суверенитет во регионот, го повика ерменското население да стане дел од азербејџанското општество.
