Австралиската рударска компанија Middle Island Resources објави нови резултати од истражувачкото дупчење на проектот Бобја кај Љубовија, кои покажуваат постоење на плиток минерализиран систем богат со злато, сребро и обоени метали.
Во втората фаза од истражувањата биле изведени 17 бушотини со вкупна должина од 1.363 метри, при што е потврдена широка минерализација во централниот, северниот и западниот дел од наоѓалиштето. Според компанијата, овие зони се поврзани во еден голем систем кој моментално се протега на околу 80.000 квадратни метри.
Како еден од најзначајните резултати е издвоена бушотината BMLRC022, каде што на само еден метар длабочина е откриен интервал од 41 метар со просечна содржина од 1,03 грама злато и 52,9 грама сребро по тон руда, како и присуство на бакар, олово и цинк.
Генералниот директор на компанијата, Питер Спирс, изјави дека проектот Бобја брзо се развива во големо плитко лежиште на злато и сребро, нагласувајќи дека сите досега испитани делови покажуваат значајна минерализација блиску до површината.
„Границите на системот сè уште не се утврдени, а минерализацијата останува отворена во повеќе правци“, посочи Спирс.
Од компанијата наведуваат дека претходните истражувања главно биле насочени кон олово, цинк и барит, додека потенцијалот за злато и сребро бил недоволно истражен. Новите анализи, според нив, покажуваат дека токму овие два метали се главен дел од минералниот систем.
Следната, трета фаза на истражно дупчење ќе биде насочена кон дополнително утврдување на големината на наоѓалиштето, особено кон северниот и јужниот дел, како и кон поврзување на веќе потврдените зони.
Проектот Бобја опфаќа пет истражни дозволи на површина од 182 квадратни километри. Middle Island Resources има десетгодишна опција за стекнување две експлоатациски дозволи од компанијата Бобја д.o.o. Љубовија, со договорен надомест од 0,5 отсто од нето приходот од топење на рудата, до максимален износ од 500.000 евра.
