Пакетот за поддршка за Украина вклучува 100 милиони долари воена помош и 10 милиони долари за хуманитарна помош
Австралиската влада најави нов пакет помош од 110 милиони долари како поддршка за Украина.
Пакетот за поддршка за Украина вклучува 100 милиони долари воена помош и 10 милиони долари за хуманитарна помош.
„Овој пакет одговара на барањата на Украина за возила и муниција и ќе направи видлива разлика на бојното поле“,
рече премиерот Ентони Албанезе, пренесува „Гардијан“.
Помошта опфаќа 70 воени возила, вклучувајќи 28 оклопни возила „М113“, 14 возила за специјални операции, 28 средни камиони „MAN 40M“ и 14 приколки. Исто така, помошта опфаќа и 10 милиони долари за украинскиот хуманитарен фонд за помош во обезбедувањето засолниште, здравствени услуги, вода и санитарни услови.
„Украинските семејства, постарите лица и децата поминаа низ страшни денови од руската инвазија. Придонесот од 10 милиони американски долари на Австралија во украинскиот хуманитарен фонд ќе ги поддржи нивните потреби“,
рече Албанезе.
Премиерот Албанезе додава дека Австралија е цврста во својата одлука да ги осуди и да се спротивстави на руските акции и да и помогне на Украина да постигне победа.
„Австралија, исто така, ќе го продолжи увозот на стоки од Украина без царина за уште 12 месеци за да го поддржи нејзиното закрепнување и трговските можности. Со тие обврски, вкупниот придонес на Австралија за поддршка на Украина изнесува 790 милиони австралиски долари, вклучително и 610 милиони австралиски долари воена помош“,
додаде тој.
Извор: 360stepeni.mk
