„Атентатот на Исмаил Ханије е државен тероризам“

ИСТАНБУЛ (АА) – Првиот заменик-претседател на Иран, Мохамад Реза Ариф, изјави дека убиството на шефот на Политичкото биро на Хамас, Исмаил Ханије, во Техеран е државен тероризам, пренесува Анадолу.

Иранската новинска агенција ИРНА јавува дека Ариф изразил сочувство до палестинскиот народ и Хамас за убиството на Ханије.

„Убиството на Ханије е манифестација на државен тероризам и една од последиците на молкот на меѓународната заедница, соочена со тековните злосторства на ционистичкиот режим и отвореното и континуирано кршење на меѓународните прописи“, рече Ариф.

Иранскиот функционер предупреди дека ваквиот развој на настаните ќе доведе до нови кризи во регионот и на меѓународно ниво.

Хамас рано утринава објави дека нејзиниот политички лидер Ханије е убиен во израелски воздушен напад врз резиденцијата во којашто престојувал во Техеран.

Ханије беше во Техеран за да присуствува на церемонијата за инаугурација на новиот претседател на Иран, Масуд Пезешкијан.

Иран и Хамас рекоа дека атентатите ги извршил Израел, а израелските власти се воздржуваат од коментар за случајот.

Ханије беше на чело на Политичкото биро на Хамас од 6 мај 2017 година на местото на Калид Мешал.

На веб страницата на Anadolu Agency (AA) објавена е само дел од содржината на вестите од Системот на проток на вести (HAS). За целосната содржина на вестите ве молиме контактирајте нè за претплата.