ВАШИНГТОН (АА) – Американската војска вчера изврши воздушни напади врз позиции на групата „Катаиб Хезбола“ во Ирак, поддржана од Иран, јавува Анадолу.
САД извршија напади врз позициите на силите во Ирак што соработуваат со Иран по нападот со беспилотно летало во кој беа ранети тројца американски војници, од кои еден е во критична состојба.
„Како одговор на повеќекратните напади врз коалициските сили во Ирак и Сирија, американските воени сили извршија воздушни напади врз повеќе објекти што ги користат „Катаеб Хезболах“ и сродните групи во Ирак“, соопшти американската Централна команда (ЦЕНКТОМ).
„Во воздушните напади беа уништени објекти што биле цел и веројатно се убиени голем број милитанти на Катаеб Хезболах“, додаде ЦЕНКТОМ, истакнувајќи дека нема погодени цивили.
„Овие напади имаат цел да ги повикаат на одговорност елементите што директно се одговорни за нападите врз коалициските сили во Ирак и Сирија и да ја намалат нивната способност да продолжат со нападите. Ние секогаш ќе ги штитиме нашите сили“, рече командантот на ЦЕНТКОМ, генералот Мајкл Ерик Курила.
Американскиот секретар за одбрана, Лојд Остин, објави дека биле извршени „неопходни и пропорционални“ напади, по наредба на претседателот Џо Бајден, врз три објекти што ги користат Катаеб Хезболах и сродните групи во Ирак.
„И да бидам јасен – претседателот и јас нема да се двоумиме да ги преземеме неопходните активности за да ги браниме Соединетите Американски Држави, нашите војници и нашите интереси. Нема поголем приоритет. Иако не сакаме да ескалира конфликт во регионот, ние сме посветени и целосно подготвени да преземеме понатамошни неопходни активности за заштита на нашиот народ и нашите објекти“, нагласи Остин.
Извор: www.aa.com.tr
